Episode 1: 3gp."كلمات الحياة" - Adeni Ta'izzi-Adeni عربي

21:03
 
مشاركة
 

Manage episode 321347855 series 3320859
بواسطة Eritrea Words of Life، اكتشفه Player FM ومجتمعنا ـ حقوق الطبع والنشر مملوكة للناشر وليس لـPlayer FM، والصوت يبث مباشرة من خوادمه. اضغط زر الاشتراك لمتابعة التحديثات في Player FM، أو ألصق رابط التغذية الراجعة في أي تطبيق بودكاست آخر.

Arabic Ta'izzi-Adeni Adeni - " Words of Life".3gp //
1 Peter

Chapter 1

1 من: بُطرس رسول يسوع المسيح إلى: المؤمنين المشتتين المغتربين في بلاد بنطس وغلاطية وكبدوكية وآسيا وبيثينية،
2 اللي اختارهم الله الأب من أول حسب علمه السابق عشان يكونوا مُقدسين بالروح، وعشان تطيعوه وتتطهروا برش دم يسوع المسيح، أصلي تزيد نعمة الله وسلامه لكم كُل حين.
3 مبارك الله أبو ربنا يسوع المسيح، اللي برحمته العظيمة خلينا نولد مرة ثانية، عشان يكون لنا أمل حي بقيامة يسوع المسيح من بين الأموات،
4 ويكون معانا نصيب محفوظ بالسماء، ما ينقصش وما يتلفش وما ينتهيش.
5 أنتم محروسين بقوة الله الموجودة بالإيمان حقكم لما تجي النجاة اللي باتظهر نهاية الزمان.
6 وبهذا خليكم فرحانين، بس لا بد الآن تحزنوا فترة قصيرة من المشاكل اللي شتجي لكم.
7 والفائدة من المشاكل هذه تفحصوا قوة الإيمان حقكم. مثلما النار تفحص الذهب، والمشاكل تفحص الإيمان حقكم اللي هو أغلى بكثير من الذهب اللي يفنى. فشتحصلوا مدح وتمجيد وتكريم، لما يجي المسيح من السماء.
8 أنتم ما تشوفش المسيح، ولكنكم تحبوموه. ومع إنكم ما تشوفش المسيح فأنتم تأمنوا فيبه. وتفرحوا فيبه فرح كبير ما يوصفش.
9 فتحصلوا هدف الإيمان حقكم، وهو نجاة نفوسكم.10 والأنبياء تكلموا من أول على هذه النعمة اللي الله جهزه لكم، وفتشوا وبحثوا عن هذه النجاة.
11 وروح المسيح اللي كان فيبهم كان يوحي لهم لي أوجاع المسيح وأمجاده اللي شتجي بعدها. فحاولوا يعرفوا متى شيقع هذا وكيف العالم شيكون لما يقع هذا.
12 وكشف لهم الله إن بحثهم هذا مش لمصلحتهم هُم، وإنما شيكون لصالحكم أنتم. وذلحين الآمور هذه وصلت لكم بواسطة اللي جاءوا بشروكم بقوة الروح القدس المُرسل من السماء. والأمور هذا الملائكة مشتاقة تعرفها.
13 إذن خلوا اذهانكم منتبها، وخليكم صاحين، وخلوا أملكم كُله بنعمة الله اللي شتحصلوها لما يرجع يسوع المسيح.
14 نفس أولاد لله مطيعين، ما يرجعوش لشهوات الماضي اللي كانت تتحكم فيبكم من أول لما كُنتم جاهلين.
15 خليكم صالحين بكُل اللي تعملوه، لأن الله قدوس وهو اللي دعي لكم.
16 ومكتوب بالكتاب: "خليكم صالحين، لأني أنا قدوس."17 أنتم تدعوا الله اب لكم، والله هو اللي يحكم على كُل واحد بعمله بدون مجاملة. ومادام كذا عليكم تعيشوا حياتكم المؤقتة بهذه الأرض بتقوى الله ومخافته. 18 من أول كنتم تعيشوا حياة باطلة ورثتموهي من ابائكم، وأنتم تعرفوا بأن الله ضحى لكم مش بحاجات تنتهي مثل الفضة والذهب،
19 ضحى لكم بدم المسيح الغالي، دم حَمل طاهر وما فيبش أي عيب.
20 فالله قا اختار المسيح للتضحية قبل خلق العالم، بس ما ظهرش إلا بهذا الأيام الأخيرة عشانكم.
21 أنتم تؤمنوا بالله بواسطة المسيح اللي أقامه من بين الأموات وجاب له المجد، عشان يكون إيمانكم وأملكم بالله.22 ونفوسكم اصبحت طاهرة بسب إنكم صدقتم الحق، وعندكم القدرة تحبوا الناس الآخرين محبة صادقة، فخلوا المحبة بينكم البين محبة قوية من قلوب. نظيفة.
23 لإن الولادة الثانية حقكم مش من أب بشري تنتهي، إنما ولدتم من كلمة الله الحية الدائمة اللي ما تنتهيش.
24 ومكتوب بالكتاب: "الناس كُلهم مثل الحشائش، وكُل قوتهم مثل زهرة الحشائش. ولابد تنتهي مثل الحشائش لما تيبس وتفلت الزهره.
25 ولكن كلمة الله جالسة للأبد." وهي الكلمة اللي وصلت لكم وبُشرتم فيبه.
Chapter 2

1 وبطلوا من كُل شر وغش ونفاق وحسد وإفتراء.
2 ومثل أطفال ولدت الآن تتعطش للحليب، تعطشوا لكلمة الله الصافية، عشان تنموا فيبها وتوصلوا للنجاة.
3 لأنكم قا طعمتم أن المسيح حلو.4 يسوع المسيح هو الحجر الحي اللي الناس ما قبلوه، لكن الله اختاره وهو غالي عنده. فتعالوا أنتم لعنده.
5 وأنتم خليكم كمان حجارة حية تبنوا فيبها بيت روحي، عشان تكونوا كهنة صالحين، تقدموا لله ذبائح روحية يقبلها الله بواسطة يسوع المسيح.
6 والله يقول بكتابه: "بأطرح بالقدس حجر غالي مختاراً، هو حجر الأساس، واللي يؤمن فيبه ما يستحيش."
7 والحجر هذا هو غالي عندكم اللي أنتم مؤمنين فيبه، أما اللي ما يؤمنوش، فهو الحجر اللي رفضه العمارين، واصبح هو حجر الأساس.
8 وهو كمان حجر يخلي الناس تصطدم فيبه، وصخرة تخليهم يتعثروا، ولِأنهم ما رضوش يؤمنوا برسالة المسيح يتعثروا وهذه نهايتهم.
9 وأما أنتم فشعب مُختار ومملكة كهنة وأمة صالحة. أنتم شعب تتبعوا الله، عشان تكلموا الناس بصفات الله العظيمة، اللي اخرجكم من الظلام إلى نوره الساطع.
10 ومن أول أنتم ما كنتمش شعب الله، والآن أنتم شعبه. وكنتم غير مرحومين من أول والآن الله رحمكم.11 يا أحبابي، أنتم مغتربين بهذه الأرض وتزورها زيارة مؤقتة. فأطلب منكم تبتعدوا عن شهوات الجسد الوسخة اللي تحارب النفس.
12 خلوا حياتكم صالحة بين الناس الغير المؤمنين. ولو هُم يتهمُوكم كذب بإنكم تفعلوا الشر، بس هُم يشوفوا أعمالكم الصالحة، فيسبحوا الله يوم يجيء.13 اتبعوا كُل حكومة تنظم مصالح الناس.
14 اتبعوا الملك، اللي هو السلطة العليا، والحكام اللي يعينهم الملك اللي يعاقبوا الناس المذنبة ويكافئوا الناس الصالحة.
15 فالله يشتيكم تعملوا الحاجات اللي هي تمام كُل وقت، فتسكتوا الكلام اللي يجي من جهل الناس الأغبياء.
16 عيشوا أحرار، بس الحرية هذه ما تستخدموهش غطاء لأشياء موش صحيحة، إنما عيشوا كأنكم عبيد لله.
17 اِحترموا كُل الناس، حبوا إخوانكم المؤمنين، اتقوا الله، أكرموا الملك.
18 إيها الخدم، اطيعوا واحترموا اسيادكم، سواء كانوا صالحين وطيبين أو قاسين.
19 ما أحسن أن الواحد يتحمل التعب وقسوة الظلم عشان الله.
20 لو كُنتم تعملوا حاجات غلط ويضربوكم وتتحملوا ، إيش من أجر لكم على غلطكم؟ أما لو كُنتم تعملوا حاجات تمام وتلاقوا ضرب وتتحملوا فأنتم هنا صح لكم فضل عند الله.
21 فالله دعاكم تشاركوا المسيح بهذا الأوجاع. فالمسيح استوجع عشانكم، وهو قدوتنا اللي نمشي بعده.
22 المسيح ما فعلش ولا غلط، ولا كذب كذبة واحدة.
23 سبوا له وهو ما ردلهمش، عذبوموه وهو ساكت ولا قلهم حاجة، إنما سلم أمره لله اللي شيحكم بالعدل.
24 المسيح تحمل الذنوب حقنا بجسمه فوق الصليب، عشان تموت الذنوب حقنا ونعيش حياة صالحة. وبالجروح حقه شُفينا.
25 بعد ما كُنتم مثل الغنم الضايع، ولكن الآن رجعتم لعند راعي النفوس وحارسها.
Chapter 3

1 وكمان أنتن أيتها الزوجات، ضروري كُل زوجة تطيع زوجها، حتى لو كان الزوج ما يؤمنش بكلام الله، يمكن لو عاملته زوجته تمام شيرجع زوجها يؤمن بدون ما تكلمه.
2 لما يشوف زوجته تعيش بطهاره وهدواء.
3 وما يكنش الجمال حقك مُزين من الخارج اللي تلبسيها، مثل ضفر الشعر ولبس الذهب ولبس الملابس الغالية.
4 خلي الجمال حقك مُزين من الداخل من القلب، فيكون قلبك مُزين بجمال الروح المتواضع الهادئ اللي ما ينتهيش، وقيمتة عند الله كبيرة.
5 وهكذا المرة الصالحة كانت تتزين زمان، وكانن يثقن بالله ويطيعن أزواجهن.
6 نفس سارة كانت تطيع إبراهيم وتدعي له سيدها. والمؤمنات اللي يعملن نفس سارة هن بنات سارة بصدق، بس يكونن يعملن أشياء تمام وما يخافنش من حاجة.7 وأنتم كمان أيها الأزواج، لا بد تعملوا حسابكم لما تعيشوا مع نسوانكم أنهن أضعف منكم، فأحترموهن فهن معاهن نصيب مثلكم بنعمة الحياة. عشان تُقبل الصلوات حقكم.
8 وبالأخير، خليكم كُلكم برأي واحد، كُل واحد يفهم الثاني، وخلوا المحبة بينكم البين نفس الاخوه، وخلوا فيبكم شفقة وتواضع.
9 ما تبادلوش الغلط بغلط نفسه، وما تردوش على السب بسب نفسه، بالعكس اعطوا اللي يسبوا لكم بركة، عشان نحصل بركة من الله فالله دعينا كذا.
10 فاللي يشتي يعيش حياة حلوة وأيام طيبة، علوه يمسك لسانه من كُل حاجة وسخة، ويمسك الشفات حقه من الغش.
11 وما يقربش الشر ويعمل الخير. ويطلب السلام ويمشي بعده عشان يحققه.
12 فالله عيونه على الناس الصالحين، واذانه يسمعان صلواتهم. ولكن الله ما يشوفش الناس اللي تعمل الشر.13 لو كُنتم ناويين تفعلوا خير من شيقدر يؤذيكم؟
14 لو لقيتم مشاكل لإنكم تعملوا عمل خير، فهنيت لكم، ما تخافوش من التهديد حقهم وما تقلقوش.
15 وإنما عظموا المسيح ربكم بقلوبكم، وخليكم جاهزين كُل وقت عشان تجاوبوا على اللي يسألكم عن الأمل اللي فيكم.
16 ويكون عملكم هذا بهدواء وإحترام وضمير صافي، حتى الناس اللي تفتري عليكم لما يشوفوكم تعيشوا حياة صالحة، بيرجعوا يستحوا منكم.
17 فالله يشتيكم تتعبوا، وأحسن لكم تتعبوا وأنتم تعملوا خير موش شر.
18 فالمسيح نفسه مات مرة واحدة عشان ذنوبنا، المسيح اللي ما عملش ذنب مات عشان الناس اللي تعملوا الذنوب، عشان يقربنا لله، فمات بجسده البشري ولكنه رجع قام حي بالروح.
19 وكمان بالروح راح وبشر الأرواح المحبوسة.
20 وهاذوه هُم اللي من زمان ما سمعموش الله لما كان منتظر لهم بصبر لما كان نوح يصلح السفينة، وما دخلش السفينة إلا ناس قليل، ثمانية رجال فقط اللي نجوا بواسطة الماء.
21 والماء هذا رمز للمعمودية اللي تنجيكم ذلحين. فالمعمودية موش غسل الجسم من الوسخ، المعمودية هي إتفاق نتعهد فيبه لله بضمير صافي. فنحصل على النجاة بقيامة يسوع المسيح من بين الأموات.
22 اللي راح السماء، وذلحين جالس جنب يمين الله، ويتحكم بالملائكة والسلطات والُحكام اللي في عالم الارواح.
Chapter 4

1 ومادام المسيح توجع بجسمه، خليكم أنتم كمان مُستعدين تستوجعوا مُثله، لأنوه اللي يستوجع بجسمه، يكون بعيد من الخطية،
2 فيعيش باقي عمره بالأرض موش بحسب الشهوات اللي تتحكم بالواحد، فيعيش بحسب اللي يشتي الله.
3 يكفيكم الوقت اللي ضاع اللي كنتم تعيشوا فيبه وتعملوا الحاجات اللي يعملها الكفار، فكنتم تعيشوا بالدعارة والشهوات والسُكر وحفلات الخلاعة والعربدة وعبادة الأصنام الخبيثة.
4 وذلحين هُم مستغربين منكم ما تمشوا معاهم بهذه بالحاجات الوسخة، وعشان كذا يسبوا لكم.
5 ولاكن هُم شيتحاسبوا قدام المسيح اللي يحاسب الأحياء والأموات.
6 والسبب هذا اللي وصل رسالة الإنجيل حتى للناس الميتين، عشان يكونوا أحياء بالروح عند الله، واما اجسامهم قا حكم عليها بالموت نفس كُل الناس.7 نهاية كُل شيء قده قريب، خليكم عاقلين ومنتبهين عشان تصلوا كُل وقت.
8 وأهم حاجة خلوا المحبة بينكم البين بقوة، فالمحبة تغفر خطايا كثيرة.
9 كُل واحد يضيف الثاني بنفس طيبة.
10 كُل واحد علوه يخدم الناس الثانيين بالموهبة اللي جابه الله له. نفس وكلاء صالحين مؤتمنين على المواهب اللي يجيبها الله بالنعمة.
11 فالكلام اللي يقوله يكون كلام الله، واللي يخدم علوه يخدم بالقوة اللي جابها الله له. عشان يتمجد الله بكل حاجة، بيسوع المسيح، له المجد والقوة إلى أبد الآبدين. آمين.
12 يا إخواني، ما تستغربوش من المشاكل الحاصلة عندكم اللي تختبركم. فما تشوفهاش حاجة غريبة تحصل لكم،
13 وإنما زيدوا افرحوا عشان اِنكم تتوجعوا مثلما اتوجع المسيح، عشان تفرحوا كثير لما يظهر مجد المسيح.
14 لو أنتم تحصلوا سب عشان اسم المسيح فهنيت لكم، لأن الروح المجيد روح الله، يستقر علوكم.
15 ولو كان واحد منكم يستوجع، ما يكونش بسبب قتل أو سرقة أو جريمة ثانية أو يدخل بحاجات الناس الثانيين.
16 أما لو استوجع بسبب أنوه مسيحي، علوه ما يستحيش، فعلوه يسبح الله عشان أنوه يحمل اسم المسيح
17 قا جاء وقت الحساب، والبداية بشعب الله. ولو كان الحساب يبدأ فيبنا إحنا، فكيف نهاية اللي ما يأمنوش بإنجيل الله؟
18 فإذا كان الإنسان الصالح صعب علوه ينجي، فكيف الإنسان الكافر والمذنب؟19 إذن اللي يستوجعوا مثلما يشتي الله، علوهم يسلموا انفسهم للخالق الأمين، ويداوموا على عمل الخير.
Chapter 5

1 وهذه نصيحتي للشيوخ اللي بينكم، وانا شيخ مثلكم، وشاهد لاِوجاع المسيح، ومعي نصيب بالمجد اللي بيجي.
2 اِرعوا رعية الله اللي بينكم، واحرسوهم مثلما يشتي الله، موش بالغصب وإنما برضاكم، وموش طمع منكم تتربحوا، وإنما برغبة منكم تخدموا.
3 ما تتحكموش باللي جابهم الله لعندكم أمانة بين إيديكم، خليكم قدوة لهم.
4 ولما يجي راعي الرعاة، شتحصلوا إكليل المجد اللي ما ينتهيش.5 وأنتم يا شباب، استمعوا للشيوخ. وخليكم كُلكم متواضعين بينكم البين، فالله يقف ضد الناس اللي تتكبر، ولاكن يجيب للناس المتواضعين نعمة.
6 فخليكم متواضعين تحت يد الله القوية، عشان يَرفعكم لما يجي الوقت المناسب.
7 اِبعدوا كُل همومكم علوه، فهو اللي شيجبر خاطركم.8 خليكم منتبهين وعاقلين. فالشيطان عدوكم مثل أسد زائر جالس يدور واحد يأكله.
9 فقاوموه وأنتم ماسكين بإيمانكم. والمشاكل اللي تواجهكم هي نفس المشاكل اللي مع اِخوانكم الموجودين بالعالم.10 ولاكن الله بيصلح أحوالكم ويثبتكم ويقويكم ويساعدكم بعد المشاكل بوقت قليل، فالله هو اللي يجيب كُل نعمة، وهو اللي دعي لكم إلى مجد المسيح اللي ما ينتهيش.
11 له القوة والمجد للنهاية. آمين.
12 انا رسلتلكم الرسالة هذه القصيرة بيد سلوانس الأخ الأمين. وهدفي اشجعكم واشهد لكم أنوه النعمة اللي أنتم فيبها هي نعمة الله الحقيقية، فخليكم ثابتين فيبها.13 واللتي في بابل تسلم عليكم، اللي الله اختاره نفسكم. وكمان ابني مرقس يسلم علوكم.14 كُل واحد يسلم على الثاني ببوسة المحبة. وسلام لكم كُلكم أنتم اللي تتبعوا المسيح.

100 حلقات